6133 0115533852 / 0935947533Kazanchiz Addis Ababa, Ethiopia

ለፀረ-ሙስና ትግሉ መጠናከር የሚዲያ ሚና

ሙስና በተንሰራፋበት ሀገር ሚዲያው ነጻና ገለልተኛ ሆኖ ለማገልገል አዳጋች ይሆንበታል፡፡ ለህብረተሰቡ መረጃዎችን ማድረስ ይቅርና የራሱም መረጃ የማግኘት መብቶች ይጣሳሉ፡፡ ተልዕኮውንም በአግባቡ ሳይወጣ ይቀራል፡፡ ይህ ደግሞ መገናኛ ብዙኃን ሙስናን የመከላከል ሥራ ከዋና ዋና ሥራዎቻቸው ውስጥ አንዱ ሊያደርጉት እንደሚገባ ያመላክታል፡፡ መገናኛ ብዙኃን በፀረ-ሙስና ትግሉ ውስጥ በራሳቸው ከሚያደርጉት አስተዋጽኦ በተጨማሪ ሕብረተሰቡ በፀረ-ሙስና ትግሉ ረገድ ጽኑ አቋም እንዲኖረው በማድረግ በኩልም የማይተካ ሚና ይጫወታሉ፡፡ይህ ሁኔታ በአለማችን ላይ በስፋት የተሰራበትና እየተሰራ ያለበት ጉዳይ ነው፡፡ ለአብነት ያህል በአሜሪካ የፕሬዚዳንት ኒክሰን መባረር (የወተርጌት ቅሌት)፣ የኢንዶኔዢያ ፕሬዚዳንት ሱሃርቶ፣ እ.ኤ.አ. በ1990ዎቹ በላቲን አሜሪካ የመገናኛ ብዙሃን የሙስና ዘገባዎች የኢኳዶሩን አብደላ ቡካራምን፣ የቬኔዙዌላውን ካርሎስ አንድሬስ ፔሬዝ እና የብራዚሉን ፈርናርዶ ኮሎርን ሙስናዎች በማጋለጥ መሪዎቹ ሥልጣን እንዲለቁ ሚዲያ የአንበሳውን ድርሻ መጫወቱን መረጃዎች ያሳያሉ፡፡ይሁን እንጅ በአገራችን እስከ አሁን ሚዲያ በፀረ-ሙስና ትግሉ ረገድ የሰራቸው ሥራዎች በቂ ናቸው ማለት አይቻልም፡፡ የአንድ ወቅት ሥራ ብቻም መሆን የለበትም፡፡ የመገናኛ ብዙኃን ትኩረታቸውን መልካም ሥነምግባርን በመገንባት ላይ በማድረግ ስለሙስና አስከፊነት የማስተማር፣ በጉዳዩ ዙሪያ ለሕዝቡ መረጃ የመስጠትና ግንዛቤ በማስጨበጥ ንቃተ ህሊናን የማሳደግ፣ የሙስና ተግባራት በምርመራ ጋዜጠኝነት አብጠርጥሮ በማውጣት የማጋለጥና የህግ ተጠያቂነት እንዲረጋገጥ የማድረግ ሥራዎችን መስራት ይኖርባቸዋል፡፡በዋናነት ሙስናን መከላከልና በሥነምግባር የታነፀ ማህበረሰብ እንዲጎለብት ማድረግ የሚዲያም አጀንዳ ሊሆን ይገባል፡፡ ሙስና የሞራል ውድቀት መሆኑን ሚዲያው ስራዬ ብሎ ህዝቡን ሊያስተምር ይገባል፡፡ የህብረተሰቡን በተለይም የህጻናትና ወጣቶችን ሥነምግባርና ግብረገብነትን ከማህበራዊ ሕይዎትና ከሀገራዊ ፍቅር ጋር አዛምዶ ማስተማርና መልካም ባህሪ እንዲያብብ ማድረግ በዋናነት ሚዲያ ሊሰራቸው ይችላል ተብሎ የሚጠበቁ ተግባራት ናቸው፡፡የፀረ-ሙስና ትግሉን እንቅስቃሴ የሚያሳዩ መረጃዎችን ለህብረተሰቡ በስፋት ተደራሽ በማድረግ በኩልም ከሚዲያ የተሻለ አማራጭ መንገድ የለም፡፡ በዚህም ረገድ ሚዲያ ከወትሮው በተለየ መልኩ ጠንክሮ በመስራት ሀገራዊና ህዝባዊ ኃላፊነቱን ሊወጣ ይገባል፡፡ በተለይ በአገራችን እምበዛም ያልተሰራበት የምርመራ ጋዜጠኝነት ሥራ በፀረ-ሙስና ትግሉ ረገድ ከፍተኛ ትኩረት ተሰጥቶት ሊሰራበት የሚገባው አብይ ጉዳይ ነው፡፡

Related Posts

Leave a Reply